同事買虛擬貨幣賺一倍 跟唔跟好

隔籬組個同事日日喺度講,話買咗半年賺咗一倍,仲話而家入都未遲。我問佢買邊隻佢又唔講清楚,淨係話「你唔識就唔好問」。想問下呢度有冇人真係玩過,係咪真係咁易賺。我唔貪一倍,賺兩成落袋都好。

我返工嗰陣有個同事都係咁,日日講自己贏幾多,後來先知佢蝕返曬。呢啲嘢同買馬一樣,你淨係聽到人講贏嗰日。

呢排個個區都係呢啲帖,標題寫「90後靠呢樣上車」嗰啲,你睇下佢最後有冇貼張單出嚟。

佢唔講買邊隻,你就當冇聽過。賺一倍但要你唔知買咩,呢個賠率唔合理。

我公司都有人講緊,不過佢係講緊幾年前嗰浸。

道理好簡單,你見人食糊先入去坐,好多時就係得你一個等緊食詐糊 🀄

博一博 單車變摩托

單車變摩托呢句,我聽咗三十年,通常係出喺蝕錢之前。你同事賺一倍,佢本金幾多?賺嗰一萬定十萬?佢唔講隻幣、唔講注碼、唔講幾時走,即係你連對數都冇得對。我唔係話一定蝕,係話你連盤都睇唔到,呢注點落。

我喺英國嗰陣都見過成條街講呢啲,搬返嚟香港又係同一批人講同一件事,只係換咗個名。真係想博,不如先當嗰筆錢冇咗都唔痛先講,唔係就唔好入。